Un an Woihnachde die Bobbekisch

von Groh-Ott Heidi

Des is e Pälzer Verzählsels iwwer Woihnachde aus de Kinnerzeit in de Siebzischer Johre. So wie märrs dehääm als gfeiert hot. Mit de ganze Bagahsch, mit de Oma, mimm Hund un mimm Oba. So wies war in re Aweiderfamilie mit viele Grewwerde, un ohne viel Färz. Do warn die vum Babba aus Zigarrekischdelscher selwärr zammegeworschdelde Bobbehaiselscher mit viele urgemiedlische Schdibbscher drin, un die dodezu geheerische Bebbscher un Teddybärscher DES Lieblingsschbielzeisch vun dänne klääne Banggerde schlechthie.
Färr die Buwe hot de Babba e elektrischi Eisebahn gebaut un e Cowboyschdadt aus Holz. Hoschd eschd gemäänt, du bischd beim Ould Tschädderhänd. Odder beim Leddersogge. Un beim Tschinggatschgohg. Kännschd Faier kreische!
Un weils in re Aweiderfamilie nie rischdisch Kohle gewwe hot färr zum Verdummbaidle, hänn sisch die Grewwerde viele Schbielsache selwärr gebaschdelt. Des hot nit nur dänne ihr Fantasie aageregt: Des waren pädagogisch wertvolle Maßnahme!
Les es selwärr, wärrschd begeischdert soi.