’n Wurt vörweg
Leiw Läser
denn’ 200. Geburtsdag von Fritz Reuter hebben wi 2010 fiert un dei „Bund Niederdeutscher Autoren“ e. V. för Mäkelborg-Vörpommern un dei Uckermark (BNA) hett ut sien Anthologie „Plattdütsch Blaumen“ dat Bauk X up dat Reuterjohr tauschnäden. Dat wi för dit Bauk denn’ Fritz-Reuter-Literaturpries 2011 krägen hebben, makt uns BNA-Autoren stolt.
Nu, 2014, steiht John Brinckmans Jubiläum vör dei Dör un dei Schriewerslüd von’n BNA gäben wedder „Plattdütsch Blaumen“ rut, dit Mal Bauk XI, tau Brinckmans 200. Geburtsdag, üm so mit Hochachtung un Freud an denn’ groten Rostocker, Güstrowschen un Mäkelborger Schaulmeister un Plattschriewer tau erinnern.
15 Autoren von unsen Schriewerbund stellen sick in Bauk XI mit ehr Bidräg vör. Ok för Bauk XI heit dat wedder: So as dei Autoren schriewen, ward dat druckt.
Uns’ Lektoren Fru Anna-Margarete Zdrenka un Herr Joachim Meier hebben all vierteigen Johr lang („Plattdütsch Blaumen“ Bauk VI bet XI) ehr Mäuh un Daun mit uns’ Riemels un Vertellers un Herr Uwe
Gloede hett bether vier Bäuker von uns’ Anthologie grotorrig illustriert. Wi bedanken uns hartlich bi dei Lektoren un denn’ Illustrator!
Dei Verantwurtlichen för Kultur in uns’ Bundesland, mihrst dat Kultusministerium in Schwerin, oewer ok Institutionen, as dei Stiftung Mäkelborg, Schwerin un ok dei ein orer anner Sponsor, hebben uns bether bi dei Rutgaw von „Plattdütsch Blaumen“ finanziell unner dei Arm gräpen. Ok för Bauk XI hebben wi wedder Fördermittel krägen. So sünd wi in dei Lag dit Bauk pünktlich tau John Brinckmans Jubiläum up’n Weg tau bringen un bedanken uns dorför bi dat Ministerium für Bildung, Wissenschaft und Kultur Mecklenburg-Vorpommern!
Rostock, Januar 2014
Wolfgang Mahnke
Ehrenvörsitter BNA
| ISBN | 9783868631333 |
|---|---|
| Erschienen | 2014 |
| Verlag | Schibri-Vlg |
| Genre | Unklassifizierbar |
| Ausgabe | Hardcover |
